جرح جاره
يا سكان المكان يا
يا ساكنين قلوبنا يا
مشيتوا وسبتونا ازاي
ولا كملنا شرب الشاى
وهانت عليكوا السنين
والود والرياحين
زمان فرح وامان
زمان كله هنا
يا ساكنين قلبنا
يا أم مروة وآلاء
ومحمد وإسراء
يا أم هيثم وأم أحمد ويا أم أنجي وإسلام
يا أم نهي ورباب
يا أم مني ودعاء
يا أمهات فى فؤادي
ياللى ولادكم ولادي
صبح ومسا بنادي
عليكو وع الحنين
يا ساكنين قلبنا
وعيون هند ونديم
أربع وخمسين باكين
ودموعهم بتسيل يآما
نلعب مع مين يا ماما ؟!
نضحك .. نخرج ..
نفرح مع مين ياماما
وجيرانا مش ويانا
وإزاي
إزاي اداوي جروح
والقلب صار مجروح
مش قادره أقول ولا أبوح
كإني طير مدبوح
الام بعد الغُنا
يا .. يا ساكنين قلبنا
يا سكان المكان
يا عمار البيوت
آه .. وآه .. وآه ...
من صوت السكوت !!
وبيوت العنكبوت
بناها حزننا
وإذا نشفت الخيوط
تشرب من دمعنا
يا .. يا ساكنين قلبنا
يا سكان المكان
يا عمار البيوت
آه .. وآه .. وآه ..
من صوت السكوت
وآه من العمارات
بقى لها فتحات
صبحت زي الحَّيات
بتنهش لحم العمار
وآه م الشبابيك
ومن سكتة الستاير
ومن التراب الحاير
مع طلوع النهار
وآه من الزقاق
ومن طعم الفراق
أمر م الصبار
وآه م الممرات
ومن هدة الخطوات
إذا اتعكس التيار
وآه من خيالكم
ومن صور أطفالكم
منقوشة ع الجدار
منقوشة ع الجدار
يا سكان المكان
ياللى كوانا فراقكوا
تتصوروا
حالى أنا فى بعادكوا ..
باشوف صورتي
فى عينيكوا
واسمع صوتي
فى كلامكوا
وأصاَّحب على أصحابكوا
واود .. صحاب صحابكوا
لحد .. ما تيجوا لنا ..
والحب يضمنا
والحي يلمنا
يا .. يا ساكنين قلبنا
قلبنا .. قلبنا .. قلبنا ..
